حضرت زهرا(س)نورخدادن خلق اولوب
خلق اولوبدی خلقتن نور ضیادن فاطمه
وار روایت خلق اولوب نور خدادن فاطمه
خلق اولاندا نور زهرا،چون یوخیدی بیر بشر
خلق اولوبدی نور اول انبیادن فاطمه
نورینی گوردی ملائیک،قالدی حیرتده بیرآن
نوری روشن تراولوب شمس ضحادن فاطمه
مظهر نور خدادور فاطمه وار چوخ دلیل
نور حقدی اولدو مشتق مصطفادن فاطمه
نوری هی تحلیل ائلردی،آللاها واردیر خبر
ال گوتورمزدی بیرآن حمد وثنادن فاطمه
نئچه مین ائیل نور زهراآللاها تعظیم ایدوب
سجده ائتدی حقه اوّل اولیادن فاطمه
اولماسیدی مصطفا خلق اولمازیدی کائنات
آللا ها اولدو عزیزه اول آتادن فاطمه
اولماسیدی مرتضا،خلق اولمازیدی مصطفا
خلقتی اولدو عجیبه اوصیادن فاطمه
اولماسیدی فاطمه خلق اولمازیدی مرتضا
آللاها اولدو عزیز هم مرتضادن فاطمه
عصمت ا.. واردی که زهرا اولوبدی منبعی
اولدو عصمت دهریده،ذات خدادن فاطمه
حوری جنتدی زهرا دهریده انسیّه دی
مه لقاتراولدو چون هر مه لقادن فاطمه
اولدولار آل عبا چون خلقتین اصلی گلی
گل لرین اولدو گلی آل عبادن فاطمه
عالمه تانیدیروب آلعبانی دهریده
هم معرِّف هم معرَّفدور کسادن فاطمه
اولدو الگوی زنان،زهرای اطهر دهریده
اولدومظهر عفت وحجب وحیادن فاطمه
اولدو کوثر مصطفایه،ایلیوب آللاه عطا
خیرکثرت چون اولوبدور او عطادن فاطمه
چوخلی واردیر یر اوزونده فاطمه زریّه سی
وار نشانی بو جهاندا چوخ بالادن فاطمه
فاطمه نی وصف ایدوب،بو عالمی خلق ایلوین
وصف اولا بیلمز بلی خلق فنادن فاطمه
وصف ائده بیلمزله معصومِ یقین عادی بشر
وصف اولوبدور جانب حیّ علادن فاطمه
اهل بیت فاطمه اولدو هدایت محوری
امته وئردی نجات چوخلی بلادن فاطمه
اولدولار باب الحوایج دهریده چون عترتی
آچدی بوعالمده چوخ دارالشّفادن فاطمه
کیمدی وئرسین دینه قربان عترت زهرا کیمی
دین یولوندا چون وئروب چوخلی فدادن فاطمه
هریره باخسان الان واردیر حسینین پرچمی
آچدی چوخ یرده علم کرب وبلادن فاطمه
دین یولوندا بو خانم گوردی مصیبت بیکران
اولدو درد و محنتی حد زیاده فاطمه
آغلیاردی هر زمان چون چکدیگی مصیبته
اولدوعالمده همی اهل بکادن فاطمه
ویردیلا اود درگهی یاندی علی مرتضا
سینه سی اولدو یارااول ماجرادن فاطمه
محسنی اولدو شهید اول ماجراده هم زمان
ضربه ی کاری گوروب اهل دغادن فاطمه
ضربه لر ائتدی اثراولدو شهیده دهریده
چوخلی یاره گوردی چوناهل جفادن فاطمه
حق یولوندا جان وئروب دخت نبی عالم بیلور
دین یولوندا دهریده اولدو فدادن فاطمه
ائتدی یاری مرتضایه گئتمه سین الدن علی
ایلدی یاری بسی شاه ولادن فاطمه
مرتضانین قوللارین آچدیرمادی زهرا مگر
وئردی مولایه نجات اول اشقیادن فاطمه
یوخ سئوزوم شیرخدادیر که علیّ المرتضا
ایلدی لیکن دفاع اول پیشوادن فاطمه
یاورشاه ولایتدور خانم عالم بیلور
ردّایدوبدور چوخ بلانی مرتضادن فاطمه
دشمنی ائتدی جفا،گوردی مصیبت بیکران
تئزدویوبدی حیف اولا دار فنادن فاطمه
قمچی لر اولدو سبب درده دوشوب جسمی ولی
اولدو شهیده بلی جور وجفادن فاطمه
آغلیار فائز همیشه حضرتین آلامینه
واردی چوخلی نسگلی چوخ ماجرادن فاطمه
